ഒരുക്കം

കാത്തിരിപ്പിന്റെ
അഴകറിയാൻ
പ്രിയപ്പെട്ടവർക്ക് വേണ്ടി
കാത്തിരിക്കണം
ഒരിക്കലെങ്കിലും

അതിനും മുമ്പ്
കാത്തിരിക്കാൻ
ഒരുങ്ങണം

പതിവില്ലാത്ത അലാറം
പതിവിലുമേറെ പല്ല് തേക്കൽ
പഴകിയതെങ്കിലും ഏറ്റവും
ഒടുവിലത്തെ പുത്തനുടുപ്പ്

എങ്ങിനെ ഒരുങ്ങണം
ഫോർമ്മലോ ,കാഷ്വലോ ?
ഈ പെർഫ്യൂം മണം
ഇഷ്ടമാകുമോ അവർക്ക് ?
മുഖത്ത് ക്രീം തേക്കണോ
വേണ്ടായോ ?
കണ്ണട വയ്ക്കണോ വേണ്ടയോ?
വെച്ചാൽ ജാഡയെന്ന് വിചാരിക്കുമോ ?
വെച്ചില്ലേൽ എന്തോ കുറവുണ്ടെന്ന്
പറയുമോ ?
ഷൂവോ ചെരുപ്പോ ?
ഹൈ ഹീലോ ,ലോയോ ?

എന്ത് പറയണം
ചിരിക്കണോ ?
ഹസ്തദാനം ചെയ്യണോ ?
അതോ രണ്ടും വേണമോ ?

വർത്തമാനങ്ങളിൽ
എന്ത് പറയണം
ഓർമ്മകളോ ?
പുതിയ വിശേഷങ്ങളോ ?

ഒരിക്കലും കണ്ണിൽ
നോക്കരുത്
കൺട്രോൾ പോവാനതുമതി,
മനസ്സിനെ എന്റെയാ പഴയകൂട്ടല്ല
അവരെന്ന് പറഞ്ഞ്
പഠിപ്പിക്കേണമാദ്യം

എന്താണ് ഓർമ്മക്കായ്
ഒരു സമ്മാനം കൊടുക്കുക
പഴയ ഫോട്ടോ ?
കൈമാറാൻ മറന്ന
അന്നത്തെ ജിമിക്കിയോ ,
ബ്രേസ്ലെറ്റോ ?
അതോ അവർക്കിഷ്ടപ്പെടുന്ന
പാവയോ ?
ഒരു കുഞ്ഞു ശിൽപ്പമായാലോ
കൃഷ്ണനോ ബുദ്ധനോ ?
ഒരു വാച്ച് ?

ഇങ്ങോട്ടെങ്ങിനെ
പെരുമാറും ?
വെറും ഒഫീഷ്യലാകുമോ ?
അതോ വാചാലമായ
പണ്ടത്തെ വർത്തമാനങ്ങൾ ?

കൂടെ ആരെങ്കിലും വരുമോ ?
അവരോട് എന്ത് സംസാരിക്കണം ?
എവിടെ വച്ചാണ് കാണുക ?
എന്താണ് കഴിക്കുക
കാപ്പിയോ ,ജൂസോ
അതോ ഏറ്റവും പ്രിയപ്പെട്ട
ഐസ്ക്രീം ?
ശ്ശോ.... ആ ഫ്ലേവർ എന്തായിരുന്നു ?

വിടപറയുമ്പോൾ
എന്താ പറയുക
പോട്ടെയെന്നോ ?
ശരി കാണാമെന്നോ ?
മിസ്സ് യൂ ......?
അല്ലെങ്കിൽ
വിരഹം കനത്ത
കണ്ണുകൾ കൊണ്ടൊരു
ആംഗ്യം ???

ഇത്രയും ഒരുങ്ങിയിട്ട്
ഇനിയവർ വന്നില്ലെങ്കിൽ ???

ഹോ..... കാണുന്നതിനേക്കാൾ
ഒരുങ്ങേണ്ടിയിരിക്കുന്നു
കാത്തിരിക്കാൻ .......
ഒരു മഴയ്ക്കെന്നപോലെ.........!

കതിരേഷ് പാലക്കാട്