നീയും നിലാവും രാത്രിയും

..............****................

പകൽ നിറയെ
മഴ പെയ്തൊഴിഞ്ഞ
രാവ്

തെളിഞ്ഞ മാനത്ത്
ഏഴാം നിലാവ്
നിറഞ്ഞ നക്ഷത്രങ്ങൾ

അതിർത്തികളില്ലാത്ത
രണ്ട് രാജ്യങ്ങളിൽ
ഒരറ്റത്ത് നീ
മറുഭാഗത്ത് ഞാൻ

ടെലിഫോണിൽ നമ്മൾ.

നിലാവും നക്ഷത്രങ്ങളും
കൂട്ടുകൂടിയ ഈ രാത്രി
പതിവിലുമേറെ
സുന്ദരമായിരിക്കുന്നു

സൗഹൃദമോ,സ്നേഹമോ ,
പ്രണയമോ ....
നിർമ്മലമായ
കുളിർ കാറ്റ്, വാക്കുകളിൽ
അതേ സുഗന്ധം

കണ്ണുകളിൽ നിറയെ
പൂക്കൾ വിടർന്ന ഈ
നിമിഷത്തിൽ
ദൂരം കൊണ്ട്
നമ്മെ അകറ്റിയ
ഭൂമിയിൽ ഇപ്പോൾ
നമ്മൾ ഒറ്റപ്പെട്ടവരല്ല

ഒരു വിളിപ്പാടകലെ
ഒരു നേർത്ത മൂളലിൽ
ഒരു ചുടുനിശ്വാസത്തിന്റെ
നേർത്ത കണികയിൽ
നാമറിയാതെ
നമ്മുടെ മനസ്സുകളെ
കൈമാറ്റം ചെയ്യുന്നു കാലം

നമ്മൾ
പരസ്പ്പരം ഏറ്റവും
പ്രിയപ്പെട്ടവരായിത്തന്നെ
ഈ രാവൊന്ന് വെളുപ്പിക്കാം

നാളെ പകലുണരുമ്പോൾ
ഹൃദയവാതിലിനപ്പുറത്ത്
വീണ്ടും മഴ പെയ്യുമായിരിക്കും.......!

കതിരേഷ് പാലക്കാട്